اقوام متحدہ کے انسانی حقوق کے ماہرین نے بھارت کی طرف سے کشمیر کی خصوصی حیثیت کو ختم اور مسلمانوں اور دوسری اقلیتوں کے سیاست میں حصہ لینے پر پابندی عائد کرنے سے متعلق قوانین بنانے پر تشویش کا اظہار کیا ہے۔ اس تشویش کا اظہار اقوام متحدہ کے اقلیتی امور، اظہار رائے کی آزادی اور اسمبلی کے بارے میں خصوصی نمائندوں نے دس فروری کو بھارتی حکومت کے نام لکھے گئے اپنے خط میں کیا۔ اقوام متحدہ اس خط کو منظر عام پر لے آئی ہے۔ اقوام متحدہ کے ماہرین نے کہا کہ علاقائی حکومت اور اس کے قانون سازی کے اختیارات کے خاتمے کی وجہ سے کشمیریوں اور دیگر اقلیتوں کا سیاسی نمائندگی کا تناسب بے حد کم ہوگیا ہے۔