پاکستان اور ترکیہ نے تجارت، معیشت، توانائی، دفاع، سیاحت اور عوامی روابط سمیت دیگر شعبوں میں باہمی تعلقات مزید بہتر کرنے کے عزم کا اعادہ کیا ہے۔
اس عزم کا اظہار آج(جمعرات کو) اسلام آباد میں پاکستان کے دورے پر آئے ہوئے ترکیہ کے صدر طیب اردگان اور صدر آصف علی زرداری کے درمیان ملاقات کے دوران کیا گیا۔
دونوں رہنماؤں نے معاشی تعاون میں اضافے کیلئے تجارت اور سرمایہ کاری میں اضافے کی ضرورت پر زور دیا۔
آصف علی زرداری نے کہا کہ پاکستان سرمایہ کاری دوست ماحول کی پیشکش کرتا ہے۔
انہوں نے حصص بازار اور معیشت کے دیگر اہم شعبوں میں ترکیہ کے سرمایہ کاروں کی طرف سے پاکستان میں سرمایہ کاری میں اضافے کی خواہش کا اعادہ کیا۔
انہوں نے پاکستان ترکیہ کے درمیان روابط اور فضائی رابطوں میں اضافے کی ضرورت پر زور دیا۔
ملاقات میں علاقائی و عالمی مسائل خاص طور پر غزہ و شام کے حوالے سے گفتگو کی گئی اور علاقے و عالمی سطح پر امن و استحکام کے قیام کیلئے مل جل کر کام کرنے پر اتفاق کیا گیا۔
آصف علی زرداری نے کشمیریوں کے حق خودارادیت کی اصولی حمایت پر صدر طیب اردگان کا شکریہ ادا کیا۔
صدر اردوان نے دوطرفہ اقتصادی تعلقات کو مزید مضبوط بنانے کیلئے ترکیہ کے عزم کا اعادہ کیا ہے۔
انہوں نے دوطرفہ تجارت کو پانچ ارب ڈالر تک بڑھانے کیلئے ترکیہ کی کمپنیوں کی پاکستان میں سرمایہ کاری کی حوصلہ افزائی جاری رکھنے کے عزم کا اظہار کیا۔
ترک صدر نے عوام سے عوام کی سطح پر تعلقات کو آئندہ نسلوں تک بڑھانے پر زور دیا۔
انہوں نے صدر پاکستان کا قبرص کے مسئلے پر ترکیہ کی مدد جاری رکھنے پر شکریہ ادا کیا۔
انہوں نے کہا کہ جموں و کشمیر کا تنازعہ بات چیت کے ذریعے اور اقوام متحدہ کی سلامتی کونسل کی قراردادوں کے مطابق حل ہونا چاہئے۔
