ہوا بازی ڈویژن کے وزیر غلام سرور خان نے کہا ہے کہ حکومت پاکستان انٹرنیشنل ائیرلائنز کی عظمت رفتہ کی بحالی کیلئے پرعزم ہے اوراس حوالے سے متعدد اقدامات کئے جارہے ہیں۔ ہفتہ کے روز راولپنڈی میں صحافیوں سے گفتگو کرتے ہوئے انہوں نے کہاکہ پی آئی اے کو ایک ایسی ائیرلائن بنایاجائے گا جس پر لوگ سفر کرتے ہوئے فخر محسوس کریںگے ۔انہوں نے کہاکہ پی آئی اے کے ذریعے سفر کرنے والے مسافروں کا تحفظ ہماری اولین ترجیح ہے انہوں نے کہاکہ پی آئی اے نے کورونا وائرس کی وبا کے دوران مختلف ملکوں سے پاکستانیوں کو واپس لانے کیلئے خصوصی پروازوں کا اہتمام کیا ۔
غلام سرور خان نے کہاکہ حکومت کی موثر حکمت عملیوں کی بدولت ملک میں کورونا وائرس کے مریضوں کی تعداد میں کمی آرہی ہے ۔انہوں نے لوگوں پر زوردیا کہ وباء کو پھیلنے سے روکنے کیلئے محرم الحرام کے دوران کورونا وائرس سے بچائو کے قواعدوضوابط پرسختی سے عمل کیاجائے ۔