محنت کشوں کے عالمی دن کے موقع پر صدرآصف علی زرداری نے اپنے پیغام میں محنت کش طبقے کے وقار کو برقرار رکھنے کے حکومتی عزم کااعادہ کیاہے اورمزدوروں کی تاریخی جدوجہد کو خراج تحسین پیش کیاہے۔انہوں نے کہاکہ یہ دن ہم سب کومزدوروں کے سماجی تحفظ کے لئے کام کرنے، مناسب اجرت کی ادائیگی اورکام کی جگہوں پر محفوظ ماحول کو یقینی بنانے کی ذمہ داریاں یاددلاتاہے۔صدرنے کہاکہ پاکستان میں محنت کشں طبقے کومہنگائی ، بے روزگاری ، روزمرہ کے بڑھتے ہوئے اخراجات اورموسمیاتی تبدیلی کے منفی اثرات جیسے غیرمعمولی چیلنجز کا سامناہے۔انہوں نے کہاکہ جفاکشوںکے حقوق کاتحفظ اور ان کے استحصال کے خاتمے کے لئے موثر پالیسیوں کانفاذ اورانہیں سماجی تحفظ فراہم کرنا ریاست کی بنیادی ذمہ داری ہے ۔صدرنے آجروں پرزوردیاکہ وہ مناسب اجرت ،کارکنوں کی صحت اورسلامتی کیلئے اقدامات ، مناسب تربیت اور خطرناک ماحول میں کارکنوں کے لئے حفاظتی سامان کی فراہمی کو یقینی بنائیں۔