وزیراعظم شہباز شریف نے موسمیاتی تبدیلی کے بڑھتے ہوئے مسائل سے نمٹنے کے لئے پالیسی کے رہنما اصولوں کو حتمی شکل دینے کے لئے کمیٹی قائم کرنے کی ہدایت کی ہے۔

وہ جمعہ کے روز اسلام آباد میں موسمیاتی تبدیلی پر پاکستان کونسل کے تیسرے اجلاس کی صدارت کررہے تھے۔

وزیراعظم نے وزارت کو صوبوں اور تمام شراکت داروں کو اس اہم پالیسی کے مسودے کی تیاری پر اعتماد میں لینے اور مسودے کو اگلے اجلاس میں پیش کرنے کی ہدایت کی۔وزیرا عظم نے کہاکہ پاکستان ان ممالک میں شامل ہے جو موسمیاتی تبدیلی کے خطرناک اثرات سے سب سے زیادہ متاثر ہو رہا ہے اور 2022 ء کے سیلاب اس کا ثبوت ہیں۔انہوں نے کہاکہ موسمیاتی تبدیلی کا مسئلہ ہر گزرتے دن کے ساتھ بدترین شکل اختیار کررہا ہے اور اس تبدیلی سے نمٹنے کے لئے صوبائی حکومتوں اور وفاق کو مل کر ایک پالیسی بنانی چاہیے۔چاروں صوبوں کے وزرائے اعلی نے اجلاس میں اپنی تجاویز پیش کیں۔