فائل فوٹو
صدر آصف علی زرداری اور وزیراعظم محمد شہبازشریف نے چاند کے مدار میں پاکستان کا پہلا مشن بھجوانے پر قوم اور سائنسدانوں کو مبارکباد دی ہے۔
صدر نے آج(جمعہ) ایک بیان میں اس کامیابی پر انسٹیٹیوٹ آف سپیس ٹیکنالوجی اور چینی مشن کے منتظمین کو مبارکباد دی۔
انہوں نے کہا کہ پاکستان کا چاند کے مدار میں پہلا مشن ملکی خلائی پروگرام میں ایک بڑا سنگ میل ہے۔
آصف زرداری نے خلائی مشن میں پاکستان اور چین کے درمیان تعاون کی تعریف کی۔
وزیراعظم شہبازشریف نے اپنے پیغام میں کہا کہ پاکستانی سائنسدان، انجینئرز اور ہنرمند افراد نے جس طرح ایٹمی ٹیکنالوجی میں مہارت کا مظاہرہ کیا اسی طرح اس شعبے میں اپنا لوہا منوا رہے ہیں۔
انہوں نے اس منصوبے میں شریک ڈاکٹر خرم خورشید، سپارکو ٹیم کے تمام ارکان اور طلبہ سمیت انسٹیٹیوٹ آف سپیس ٹیکنالوجی کی کورکمیٹی کو بھی سراہا۔
شہبازشریف نے کہا کہ اس اہم کامیابی کے بعد پاکستان خلاء کے بامقصد استعمال کے نئے دور میں داخل ہو گیا ہے۔
یہ کامیابی سیٹلائٹ مواصلات کے شعبے میں پاکستان کی صلاحیتوں میں مزید اضافے کا باعث بنے گی اور سائنسی تحقیق، معاشی ترقی اور قومی سلامتی کے شعبوں میں مواقع پیدا کرے گی۔
