وزیرخزانہ محمد اورنگزیب نے مجموعی ملکی پیداوار کے مقابلے میں ٹیکس کی شرح بڑھانے اور ٹیکس کا دائرہ وسیع کرنے کیلئے حکمت عملی وضع کرنے کی اہمیت کو اجاگر کیا ہے تاکہ محصولات کی وصولی زیادہ سے زیادہ بڑھائی جا سکے۔
انہوں نے یہ بات آج(جمعہ) اسلام آباد میں ایف بی آر کے صدر دفتر کے دورے کے موقع پر کہی۔
وفاقی وزیر نے رواں سال کے محصولات جمع کرنے کا ہدف حاصل کرنے کیلئے ممکنہ کوششیں کرنے کی ضرورت پر زور دیا۔
ملاقات میں ایف بی آر کے چیئرمین ملک امجد زبیر ٹوانہ نے وزیر خزانہ کو محصولات جمع کرنے کے سلسلے میں کوششوں کے بارے میں تفصیل سے آگاہ کیا۔
ملاقات میں زیرالتواء قانونی مقدمات بھی زیرغور آئے۔
ملاقات میں فیصلہ کیا گیا کہ پھنسے ہوئے محصولات کی جلد وصولی کے لئے تمام زیرالتواء قانونی مقدمات کی بھرپور پیروی کے لئے ایک جامع حکمت عملی مرتب کی جائے گی۔