رات دبئی میں آئی سی سی ٹی ٹونٹی ورلڈ کپ میں پاکستان نے بھارت کو دس وکٹوں سے شکست دے کر کسی بھی ورلڈ کپ میں اپنے روایتی حریف کے خلاف پہلی فتح حاصل کی۔بھارت نے پہلے بیٹنگ کرتے ہوئے سات وکٹوں کے نقصان پر جیت کیلئے ایک سو باون رنز کا ہدف دیا۔جواب میں پاکستان نے کسی نقصان کے بغیر مطلوبہ ہدف حاصل کر لیا جبکہ میچ کی تیرہ گیندیں ابھی باقی تھیں۔بابر اعظم نے ارسٹھ اور محمد رضوان نے اناسی رنز بنائے اور آئوٹ نہیں ہوئے۔اس سے پہلے شاہین شاہ آفریدی نے اکتیس رنز کے عوض بھارتی کپتان کو ہلی سمیت تین کھلاڑی آئوٹ کر کے فتح کی راہ ہموار کی اور بھارت کو ایک سو اکاون رنز تک محدود رکھا۔شاہین شاہ آفریدی کو میچ کا بہترین کھلاڑی قرار دیا گیا۔

صدر ڈاکٹر عارف علوی اور وزیر اعظم عمران خان نے پاکستان کرکٹ ٹیم کو روایتی حریف بھارت کے خلاف تاریخی کامیابی پر مبارکباد دی ہے۔صدر نے ایک ٹویٹ میں کہا کہ گرین شرٹس پر ہمیں فخر ہے ۔وزیر اعظم نے بھی اپنے ٹویٹ میں پاکستان کرکٹ ٹیم کے کپتان بابر اعظم کو خصوصی مبارکباد دی جنہوں نے آگے بڑھ کر قیادت کی ،اسی طرح محمد رضوان اور شاہین آفریدی نے بھی شاندار کارکردگی کا مظاہر ہ کیا۔وزیر اعظم نے کہا کہ قوم کوٹیم کے تمام کھلاڑیوں پر فخر ہے۔

پاکستانی ٹیم خصوصاً بابر اعظم، جنہوں نے پوری جرات سے ٹیم کی قیادت کی اور رضوان اور شاہین آفریدی، جنہوں نے نہایت شاندار کارکردگی کا مظاہرہ کیا،کو دلی مبارکباد پیش کرتا ہوں۔ قوم کو آپ سب پر

فخر ہے۔ pic.twitter.com/AfcrvI2JIC

— Imran Khan (@ImranKhanPTI) October 24, 2021

شاباش گرین شرٹس۔مکمل صفایا۔دس وکٹوں سے میچ جیت لیا۔ہمیں آپ پر فخر ہے۔ ایک اچھا میچ تھا مزا آگیا۔پاکستنیوں آپ سب کو مبارک ہو۔ pic.twitter.com/sJVgINW4FU

— Dr. Arif Alvi (@ArifAlvi) October 24, 2021

ادھراطلاعات ونشریات کے وزیر چوہدری فواد حسین ،وزیر داخلہ شیخ رشید احمد ، اطلاعات و نشریات کے وزیر مملکت فرخ حبیب،بری فوج کے سربراہ جنرل قمر جاوید باجوہ ، دفتر خارجہ کے ترجمان عاصم افتخار اور اقوام متحدہ میں پاکستان کے مستقل مندوب منیر اکرم نے بھارت کے خلاف شاندار فتح پر قوم اور پاکستانی کرکٹ ٹیم کو مبارکباد دی ہے۔وزیر اطلاعات نے اپنے ٹویٹ پیغام میں کپتان بابر اعظم ،وکٹ کیپر محمد رضوان اور شاہین آفریدی کی شاندار کارکردگی کو سراہا ہے۔اطلاعات و نشریات کے وزیر مملکت فرخ حبیب نے بھارت کے خلاف پاکستان کی فتح کو کرکٹ کی سرجیکل سٹرائیک قرار دیا۔فوج کے شعبہ تعلقات عامہ کے ڈائریکٹر جنرل کی طرف سے جاری کئے گئے بیان کے مطابق بری فوج کے سربراہ نے اپنے مبارکباد کے پیغام میں کہا کہ پاکستان کرکٹ ٹیم نے ہمارا سر فخر سے بلند کر دیا ہے۔