وزیراعظم محمد شہباز شریف نے کہا ہے کہ حکومت ایک جامع پیکیج کے ذریعے انفارمیشن ٹیکنالوجی اور ٹیلی مواصلات کے شعبے کو زیادہ سے زیادہ سہولتیں فراہم کرے گی تاکہ سالانہ پانچ ارب ڈالر برآمدات کا ہدف حاصل کیا جا سکے۔
وہ اسلام آباد میں ایک اجلاس کی صدارت کر رہے تھے جس میں ملک میں انفارمیشن ٹیکنالوجی اور ٹیلی کام کے شعبے کو ترقی دینے کے لئے فعال حکمت عملی تیار کرنے کا جائزہ لیا گیا۔انہوں نے کہا کہ اس شعبہ کو سالانہ پانچ ارب ڈالر کی برآمدات کا ہدف حاصل کرنا چاہئے۔شہباز شریف نے کہا کہ حکومت آئی ٹی اور ٹیلی کام کے شعبے کی ترقی کے بارے میں تمام تر سہولیات کی فراہمی کیلئے پرعزم ہے جس میں زرمبادلہ کے وسیع مواقع موجود ہیں۔وزیراعظم نے کہا کہ آئی ٹی اور ٹیلی کام کے شعبے میں ترقی کے تمام مواقع سے بھر پور فائدہ اٹھایا جائے۔انہوں نے عزم ظاہر کیا کہ انفارمیشن ٹیکنالوجی اور ٹیلی مواصلات کو ملک کا مضبوط ترین شعبہ بنانے کیلئے حکومت موثر پالیسی اور سہولیات کی فراہمی کے ذریعے اس کی راہ میں حائل تمام مسائل حل کرے گی۔