وزیراعظم عمران خان نے عالمی رہنمائوں پرزوردیا ہےکہ وہ بھارت کو اس ناقابل قبول رستے پر چلنے سےروکیں جس سے کشمیری عوام کے قانونی اور عالمی سطح پردئیے گئے حقوق مزید سلب ہوں اور جنوبی ایشیا کا امن و استحکام سنگین خطرے سے دوچار ہوجائے۔
آج ایک ٹویٹ میں وزیراعظم نے کہا کہ انہوں نے اقوام متحدہ کے سیکرٹری جنرل سے رابطہ کیا ہے اور وہ اس حوالے سے دوسرے عالمی رہنماوں سے بھی رابطے کررہے ہیں۔
انہوں نے کہا کہ پہلے بھارت نے مقبوضہ جموں و کشمیر کے غیرقانونی انضمام کی کوشش کی اور اب پچیس ہزار بھارتی شہریوں کو ڈومیسائل سرٹیفکیٹس جاری کرکے مقبوضہ وادی کا آبادی کا تناسب تبدیل کرنے کی کوشش کی ہے۔
وزیراعظم نے کہا کہ بھارت کے یہ تمام اقدامات غیرقانونی اور اقوام متحدہ کی قراردادوں اورچوتھے جنیوا کنونشن سمیت عالمی قوانین کی صریحاً خلاف ورزی ہیں۔