وزیراعظم عمران خان نے کہا ہے کہ کورونا وائرس کے دوران حزب اختلاف کی طرف سے عوام کی زندگیوں کی قیمت پر عوامی جلسے اور ریلیاں نکالنے کا مقصد این آر او حاصل کرنے کے لئے حکومت پر دباؤ ڈالنا ہے۔
انہوں نے اتوار کے روز مختلف ٹویٹس میں کہا کہ حزب اختلاف کی سیاسی قیادت کا واحد مقصد اپنی بدعنوانی اور لوٹی ہوئی دولت کو بچانا ہے جس کیلئے وہ آخری سرتوڑ کوششیں کر رہی ہے۔ تاہم اس میں کامیاب نہیں ہو گی۔وزیراعظم نے کہا کہ حزب اختلاف کے رہنماؤں نے ملکی عوام کی خدمت نہیں کی اور ان کے شاہانہ طرز زندگی کا انحصار براہ راست اپنی ناجائز ذرائع سے حاصل کی گئی دولت پر ہے جو انہوں نے قوم سے لوٹ مار کر کے حاصل کی۔عمران خان نے کہا کہ کرونا وائرس کے دوران پاکستان کے عوام کا مسئلہ سیاسی قیادت ہے جس نے کبھی جمہوری جدوجہد نہیں کی۔انہوں نے نہ کبھی عام آدمی کی مشکلات کو سمجھا اور نہ اس کی بہتری کے لئے کوئی اقدام کیا۔عمران خان نے کہا کہ یہ رہنما اپنے شاندار محلات میں رہتے ہیں اور انہیں یہ مال و دولت ورثے میں ملی ہے۔ اس لئے انہیں عام شہری کی زندگی کی کوئی فکر نہیں۔وزیراعظم نے کہا کہ جب ہم نے عوام کو مفلسی اور معیشت کو زوال سے بچانے کیلئے سمارٹ لاک ڈاؤن کیا تو ان لوگوں نے اس کی مخالفت کی اور مکمل لاک ڈاؤن کا مطالبہ کیا اور اب جب کورونا وائرس کے پھیلاؤ کی روک تھام کیلئے پھر سمارٹ لاک ڈاؤن کی ضرورت ہے تو وہ عوام کی زندگیوں کی قیمت پر عوامی جلسے کرنا چاہتے ہیں۔
