فائل فوٹو
منصوبہ بندی ترقی اور خصوصی اقدامات کے وزیر اسد عمر نے کورونا وائرس کے مریضوں کی سہولت کیلئے ہسپتالوں میں بستر وینٹی لیٹرز کی دستیابی سے متعلق تازہ ترین معلومات کی فراہمی کا طریقہ کار وضع کرنے کی ضرورت پر زور دیا ہے ۔
نیشنل کمانڈ اینڈ کنٹرول سینٹر میں ایک اجلاس کی صدارت کرتے ہوئے انہوں نے کہا کہ معلومات کی دستیابی سے مریضوں کو اپنی ترجیح کے مطابق ہسپتالوں میں داخلے کی سہولت حاصل ہو گی۔
اسد عمر نے کہا کہ پیر کوقومی رابطہ کمیٹی کے ہونے والے ایک خصوصی اجلا س میں آئندہ ماہ کیلئے کورونا وائرس کی وباء کی روک تھام سے متعلق حکمت عملی کو حتمی شکل دی جائے گی۔
اجلاس میں بتایا گیا کہ کورونا وائرس کے مریضوں کیلئے ملک بھر کے ہسپتالوں میں مناسب تعداد میں بستر اور وینٹی لیٹرز دستیاب ہیں تاہم زیادہ تر متاثرہ افراد گھروں میں ہی خود کو قرنطنیہ میں رکھنے کو ترجیح دیتے ہیں۔
اجلاس میں کورونا وائرس سے بچائو کے حفاظتی اقدامات اور ضابطہ کار پر عملدرآمد کا بھی جائزہ لیا گیا۔