قومی اسمبلی کے ڈپٹی سپیکر قاسم خان سوری نے کہا ہے کہ جنوبی ایشیا میں امن و استحکام اقوام متحدہ کی قراردادوں کے مطابق تنازعہ کشمیر کے حل سے وابستہ ہے۔
انہوں نے یہ بات آزادجموں و کشمیر کے صدر سردار مسعود خان سے بدھ کے روز مظفرآباد میں ملاقات کے بعد صحافیوں سے گفتگو کرتے ہوئے کہی۔ڈپٹی سپیکر نے کہا کہ پاکستان کشمیریوں کے حق خودارادیت کی حمایت جاری رکھے گا کوینکہ انہیں یہ حق دے کر ہی خطے میں امن و سلامتی قائم کی جا سکتی ہے۔انہوں نے کہا کہ تمام سیاسی جماعتوں کا مسئلہ کشمیر کے بارے میں یکساں موقف ہے۔اس موقع پر آزادجموں و کشمیر کے صدر سردار مسعود خان نے کہا کہ جب تک بھارت متنازعہ علاقے کی خصوصی حیثیت بحال نہیں کرتا پاکستان اور بھارت کے درمیان مذاکرات ممکن نہیں۔
