تیسرا سی پیک میڈیا فورم پیر کے روز اسلام آباد میں شروع ہوا جس کا مقصد دونوں ملکوں کے ذرائع ابلاغ کو قریب لاتے ہوئے معلوماتی اورثقافتی اشتراک کو فروغ دینا ہے۔ فورم کے افتتاحی اجلاس سے خطاب کرتے ہوئے اقتصادی راہداری کے بارے میں پارلیمانی کمیٹی کے چیئرمین سینیٹرمشاہد حسین سید نے کہا کہ عوامی سطح پر روابط اور ذرائع ابلاغ کے مابین تعاون اقتصادی راہداری سے زیادہ سے زیادہ فائدہ اٹھانے کے لئے انتہائی اہمیت کا حامل ہے۔انہوں نے کہا کہ ترقیاتی کوششیں دہشت گردی اور انتہا پسندی کا موثر جواب ہیں اور ان منصوبوں کی میڈیا کے ذرائع تشہیر سے ان کے مقاصد کے حصو ل میں مدد ملے گی۔ مشاہد حسین سید نے کہا کہ پاک چین اقتصادی راہداری پاکستان کے مستقبل کے لئے چین کے اعتماد کی مظہر ہے جس سے ملک بھر میں ترقی اورخوشحالی آئے گی۔ اس موقع پر اظہار خیال کرتے ہوئے سینیٹر عبدالقیوم نے کہا کہ اقتصادی راہداری ایک اہم منصوبہ اور ایک معاشی تصور ہے۔پاکستان میں چین کے سفیر Yao jingنے فورم سے خطاب کرتے ہوئے کہا کہ چین پاکستان اقتصادی راہداری میڈیا فورم ہمارا اعلی سطح کا تعاون اور شراکت داری ہے اور یہ منصوبہ کامیاب تکمیل کے لئے مزید ذمہ داری کا متقاضی ہے۔ چینی سفیر نے پورے خطے کے لئے چین اورپاکستان کے درمیان تعاون بڑھانے پر زور دیا کیونکہ چین پاکستان اقتصادی راہداری بہتر روابط اورپرامن ہمسائیگی کا منصوبہ ہے۔