پاکستان میں سیاحت کے فروغ کیلئے کئے گئے اقدامات پر اب تک کی پیش رفت کے بارے میں جائزہ اجلاس کی صدارت کرتے ہوئے عمران خان نے کہا ہے کہ پاکستان سیاحت کے اعتبار سے پورے خطے میں سب سے زیادہ وسائل کا حامل ملک ہے۔انہوں نے زور دیا کہ پاکستان کو خطے میں سیاحت کا مرکز بنانے کیلئے اقدامات مقررہ وقت کے اندر اٹھانے چاہئیں جس سے سرمایہ کاری اور غیر ملکی زرِ مبادلہ آئے گا۔سیاحت کی اہمیت پر زور دیتے ہوئے عمران خان نے کہا کہ سیاحتی تہواروں کا کیلنڈر اُن کی اہمیت کو مد نظر رکھتے ہوئے تیار کیا جانا چاہئیے تاکہ سیاح ان تہواروں میں کسی رکاوٹ کے بغیر شرکت کر سکیں۔اجلاس کو بتایا گیا کہ تمام صوبوں میں سیاحتی مقامات کی جیو میپنگ کا کام تقریباً مکمل ہو چکا ہے۔اس اقدام سے سیاحتی مقامات پر ترقیاتی کاموں اور سرمایہ کاری میں مدد ملے گی۔اجلاس کو نندانہ قلعے میں ترقیاتی کام کے آغاز اور ساحلی سیاحت کے فروغ کیلئے اٹھائے گئے اقدامات کے بارے میں بھی آگاہ کیا گیا۔