کشمیر کے بارے میں پارلیمانی کمیٹی کے چیئرمین شہریار خان آفریدی نے کہا ہے کہ پوری پاکستانی قوم بھارت کے غیرقانونی زیرقبضہ جموں و کشمیر کے عوام کے حق خودارادیت کی منصفانہ جدوجہد میں ان کے ساتھ کھڑی ہے۔
انہوں نے جمعہ کے روز ملتان میں ایک سیمینار سے خطاب کرتے ہوئے کہا کہ بھارت میں مسلمانوں کو بدترین مظالم کاسامنا ہے اور انہیں ہندومت قبول کرنے پر مجبور کیا جا رہا ہے۔شہریار آفریدی نے کہا کہ بھارت کی طرف سے مقبوضہ جموں و کشمیر میں آبادی کا تناسب تبدیل کرنے کی دہشت گردی کی وجہ سے اس پر پابندیاں عائد کی جانی چاہئیں۔انہوں نے کہا کہ بھارت پاکستان میں بھی دہشت گردی کی پشت پناہی کر رہا ہے اور ہم نے اس سلسلے میں ایک دستاویز کی شکل میں دنیا کوناقابل تردید ثبوت فراہم کئے ہیں۔