وزیر خزانہ شوکت ترین نے کہا ہے کہ حکومت عالمی سطح پر مہنگائی سے متاثر ہونے والے معاشرے کے مختلف طبقوں کی آمدن بہتر بنانے کیلئے اگلے چند روز میں ایک پروگرام تشکیل دے گی۔
انہوں نے آج (بدھ)اسلام آباد میں ایک نیوز کانفرنس سے خطاب کرتے ہوئے اس بات کااعتراف کیا کہ مہنگائی کے باعث تنخواہ دار اور شہروں میں مقیم غریب اور متوسط طبقہ مشکلات کا شکار ہے۔ شوکت ترین نے کہا کہ حکومت نے دو کروڑ گھرانوں کو گھی، دالیں اور آٹا جیسی اشیائے خوردونوش کی رعایتی قیمت پر فراہمی کیلئے احساس راشن پروگرام شروع کیا ہے۔ انہوں نے کہاکہ کامیاب پاکستان پروگرام بھی شروع کیا گیا ہے اور اس کے تحت اب تک ایک ارب روپے تقسیم کئے گئے ہیں۔وزیر خزانہ نے کہا کہ معیشت ترقی کررہی ہے اور امید ہے کہ رواں مالی سال کے اختتام تک ترقی کی شرح پانچ فیصد ہوگی۔ انہوں نے کہا کہ محاصل کی وصولی میں ریکارڈ اضافہ ہوا ہے جبکہ برآمدات اور ترسیلات زر بھی بڑھ رہی ہیں۔