وزیراعظم عمران خان نے قوم سے اپیل کی ہے کہ کرونا واہرس کے پھیلاؤ کی روک تھام کیلئے احتیاطی تدابیر پر سختی سے عمل کریں۔آج (بدھ) شام لاہور میں صحافیوں سے گفتگو کرتے ہوئے انہوں نے کہا کہ اگر احتیاطی تدابیر مکمل اختیار نہ کی گئیں تو ہسپتالوں کے ساتھ ساتھ معیشت پر بھی دباؤ پڑے گا۔وزیراعظم نے عوام پر زور دیا کہ لازمی ماسک پہنیں جو اس وبا سے بچنے کا آسان طریقہ ہے۔انہوں نے کہا کہ حکومت نے کارخانے اور کاروبار بند نہ کرنے کا فیصلہ کیا ہے تاکہ لوگوں کو غربت و افلاس سے بچایا جا سکے۔ایک سوال کے جواب میں عمران خان نے کہا کہ ہم نے اس وبا کا پھیلاؤ روکنے کیلئے اپنی ریلیاں ملتوی کر دی ہیں۔انہوں نے کہا کہ حکومت حزب اختلاف سمیت کسی کو عوام کی زندگیاں خطرے میں ڈالنے کی اجازت نہیں دے گی۔انہوں نے کہا کہ وہ کسی کو جلسوں کی وجہ سے این آر او نہیں دینگے۔