وزیر اعلیٰ پنجاب سردار عثمان بزدارنے کہا ہے کہ اورنج لائن ٹرین منصوبے کی تکمیل سے شہریوں کو عالمی طرز کی سفری سہولیات میسر آئیں گی۔ آج لاہور میں اورنج لائن ٹرین کی افتتاحی تقریب سے خطاب کرتے ہوئے انہوں نے کہا کہ سی پیک سے پاکستان اور چین کے دوطرفہ تعلقات میں مزید مضبوط ہونگے۔ انہوں نے کہا کہ حکومت سیاسی تعصبات سے بالاتر ہو کر سابقہ حکمرانوں کے منصوبے بھی پایہ تکمیل کو پہنچا رہی ہے ۔ انہوں نے کہا کہ لاہور کے لوگوں کو عالمی طرز کی سفر سہولیت مہیا کرنے پر چینی حکومت کا شکریہ ادا کیا اور کہا کہ پنجاب حکومت اورنج لائن ٹرین چلانے کیلئے 15ارب روپے کی سبسڈی دے گی۔ وزیر اعلیٰ نے کہا کہ پاک چین دوستی ہر آزمائش پر اتری ہے اور پاک چین اقتصادی راہداری کے کئی منصوبے تکمیل کے مراحل میں ہیں اور ان کی تکمیل سے ترقی اور خوشحالی کے نئے دور کا آغاز ہوگا۔ عثمان بزدار نے چینی کمپنیوں اور سرمایہ کاروں کو پاکستان میں مختلف شعبوں میں سرمایہ کاری کی دعوت دیتے ہوئے کہا کہ پنجاب میں زراعت، لائیو اسٹاک سمیت کئی شعبوں میں سرمایہ کاری کے وسیع مواقع موجود ہیں۔