بھارت کے غیرقانونی زیرتسلط جموں وکشمیر میں میر واعظ عمر فاروق کی سرپرستی میں قائم حریت فورم سمیت حریت قیادت نے سری نگر سے جاری ایک بیان میں بھارت اور پاکستان پر زوردیا ہے کہ وہ پورے جنوبی ایشیاء کے خطے میں پائیدار امن کے قیام کیلئے جموں وکشمیر کے دیرینہ تنازعے کو کشمیری عوام کی خواہشات کے مطابق حل کریں۔
سرینگر اور وادی کشمیر کے دیگر علاقوں میں پوسٹر چسپاں کئے گئے ہیں جن پرپاکستان زندہ باد اور کشمیر بنے گا پاکستان" جیسے نعرے درج ہیں۔ ادھر گزشتہ سال 11 جولائی سے غیر قانونی طورپرنظربند تحریک حریت جموں و کشمیر کے چیئرمین محمد اشرف صحرائی کی صحت جموں کی ادھم پور جیل میں تشویشناک حد تک بگڑ گئی ہے ۔ایک تجزیاتی رپورٹ میں انکشاف کیا گیا ہے کہ مودی کی فسطائی بھارتی حکومت کے دور میں بھارتی قابض فورسز کے ہاتھوں کشمیری عوام کودرپیش مشکلات اور مصائب میں کئی گنا اضافہ ہو گیا ہے ۔رپورٹ میں کہاگیاہے کہ پانچ اگست2019ء کے بعد سے بھارتی فوجیوں نے 312کشمیریوں کو شہید اور 17 سوسے زائد کو زخمی کردیاہے ۔