فائل فوٹو
موسمیاتی تبدیلی کی وزیر مملکت زرتاج گل نے کہاہے کہ بھارت کو چاہیے کہ وہ مقبوضہ کشمیر کی اصل صورتحال جاننے کیلئے اقوام متحدہ اور عالمی مبصرین کو مقبوضہ وادی تک رسائی دے جس طرح پاکستان نے انہیں کنٹرول لائن تک رسائی فراہم کی تھی ۔
ریڈیو پاکستان کے خبروں اور حالات حاضرہ کے چینل سے گفتگو کرتے ہوئے انہوں نے کہا کہ مودی حکومت نے خطے کو دائو پر لگادیا ہے اور عالمی برادری کو کشمیر کا مسئلہ حل کرنے کیلئے اپنا کردار ادا کرنا چاہیے انہوں نے کہا کہ اقوام متحدہ کشمیریوں کا خودارادیت کا حق دلوانے کیلئے سلامتی کونسل کی طرف سے منظور کی گئی قراردادوں پر عملدرآمد یقینی بنائے۔
جموں و کشمیر کا اہم مسئلہ اجاگر کرنے میں ریڈیو پاکستان کے کردار کو سراہاتے ہوئے انہوں نے کہا کہ ریڈیو پاکستان وہ واحد ذریعہ ہے جس کی مقبوضہ وادی تک رسائی ہے کیونکہ بھارت نے اپنا سیاہ چہرہ چھپانے کیلئے پانچ اگست سے وہاں پرنٹ اور الیکٹرونک میڈیا پر پابندی عائد کر رکھی ہے۔
پروگرام میں اظہار خیال کرتے ہوئے قومی اسمبلی میں قانون انصاف کی قائمہ کمیٹی کے چیئرمین ریاض فتیانہ نے کہا کہ پاکستان علاقائی اور عالمی سطح پر کشمیر کا مسئلہ اجاگر کررہا ہے اور دنیا کو اس سلگتے مسئلے کا احساس دلایا ہے انہوں نے کہاکہ پاکستان کے موقف کو عالمی سطح پر سراہا جارہا ہے اور اس مسئلے پر متعدد عالمی فورموں میں بحث کی جارہی ہے۔
پروگرام میں حصہ لیتے ہوئے منصوبہ بندی، ترقی اور اصلاحات کے بارے میں پارلیمانی سیکرٹری Kanwal Shauzab نے کہاکہ کشمیری ایک سو دن سے زائد عرصے مسلسل بھارتی مظالم کا سامنا کررہے ہیں۔