پاکستان تحریک انصاف سے تعلق رکھنے والے سندھ اسمبلی کے اراکین نے آج کراچی میں الیکشن کمیشن میں ایک درخواست دائر کی ہے جس میں پاکستان پیپلز پارٹی کی رکن اسمبلی فریال تالپور کو نااہل قرار دینے کی استدعا کی گئی ہے جنہیں اس وقت جعلی اکائونٹس، منی لانڈرنگ اور بدعنوانی کے الزامات کا سامنا ہے۔ یہ درخواست پاکستان تحریک انصاف کے اراکین حلیم عادل شیخ اورارسلان تاج نے دائر کی۔درخواست میں کہاگیا کہ فریال تالپور کواسلام آباد ہائیکورٹ میں مقدمات کا سامنا ہے اس لئے وہ اسمبلی کی رکن نہیں رہ سکتیں۔ درخواست دائر کرنے کے بعد صحافیوں سے گفتگو کرتے ہوئے حلیم عادل شیخ نے کہاکہ بدعنوانی میں ملوث ہر شخص کو انکوائری کا سامنا کرنا پڑے گا اور اسے اپنے جرائم کی سزا بھگتنی ہوگی۔