ممتاز تجزیہ کاروں نے کہا ہے کہ قطر کے امیر کے پاکستان کے دورے سے دونوں ملکوں کے درمیان اقتصادی تعلقات کو فروغ ملے گا۔

ریڈیو پاکستان کے خبروں اور حالات حاضرہ کے چینل سے گفتگو کرتے ہوئے انہوں نے کہا کہ قطر پاکستان میں سرمایہ کاری میں گہری دلچسپی رکھتا ہے۔

بین الاقوامی تعلقات کے ماہر بی اے ملک نے کہا کہ پاکستان اور قطر کے درمیان اقتصادی شراکت داری سے قومی معیشت مستحکم ہوگی۔

پروگرام میں اظہار خیال کرتے ہوئے بین الاقوامی تعلقات کے ایک اور ماہر مشتاق احمد مہر نے کہا کہ حکومت ملک کو اقتصادی خوشحالی کی راہ پر گامزن کرنے کیلئے پرعزم ہے۔

انہوں نے کہا کہ پاکستان میں تیل، پیداوار، سیاحت، افزائش حیوانات اور خوراک کو محفوظ بنانے کے شعبوں میں سرمایہ کاری کی وسیع گنجائش ہے۔