پاکستان نے کورونا وائرس سے بچائو کی ویکسین کی تیسرے مرحلے کی آزمائش شروع کردی ہے جسے چین کی ایک کمپنی نے تیار کیا ہے۔
آج ایک ٹویٹ میں منصوبہ بندی کے وزیراسد عمر نے کہا ہے کہ سات ملکوں میں مجموعی طورپر چالیس ہزار افراد اس آزمائش میں حصہ لیں گے جن میں آٹھ سے دس ہزار پاکستانی شامل ہوں گے ، انہوں نے کہا کہ ابتدائی نتائج چار سے چھ ماہ میں متوقع ہیں۔
ادھر آج اسلام آباد میں صحافیوں کو بریفنگ دیتے ہوئے صحت کے معاون خصوصی ڈاکٹر فیصل سلطان نے کوڈ19ویکسین کی طبی آزمائش کو مختلف امراض کے خلاف دوسری ویکسین کی تیاری میں ملک کی صلاحیت کےلئے ایک اہم قدم قرار دیا۔
انہوں نے کہا کہ اب پاکستان بھی ان ملکوں کی فہرست میں شامل ہوگیا ہے جوکوڈ19 ویکسین کی طبی آزمائش کررہے ہیں۔
قومی ادارہ صحت کے ایگزیکٹو ڈائریکٹر میجر جنرل عامر اکرام نے کہا کہ ویکسین کی حفاظت یقینی بنائی جائے گی کیونکہ یہ اب چین میں سکیورٹی اہلکاروں کو دی جارہی ہے۔