وزیراعظم عمران خان منگل کو سعودی عرب کا دورہ کریں گے جہاں وہ ریاض میں مستقبل میں سرمایہ کاری منصوبے کے بارے میں کانفرنس میں شرکت کریں گے۔ وہ شاہ سلمان بن عبد العزیز کی خصوصی دعوت پر یہ دورہ کررہے ہیں۔ صحرا میں ڈیووس کے نام سے ہونے والی کانفرنس ممتاز کاروباری شخصیات، سرمایہ کاروں، بڑے کارپوریٹ اداروں اور جدید ٹیکنالوجی کی صنعت اوربڑے صحافتی اداروں کے نمائندوں کو ایک پلیٹ فارم پر لائے گی۔وزیراعظم عمران خان کانفرنس کے پہلے روز کے سیشن میں شرکت کریں گے جس کا مقصد پاکستان میں اقتصادی اور سرمایہ کاری کے مواقع اور اگلے پانچ سال کیلئے اس کے ویژن کو اجاگر کرنا ہے۔ کانفرنس پاکستان میں سرمایہ کاری کے خواہشمند اہم تاجر رہنماوں کو رابطے کا موقع فراہم کرے گی۔عمران خان شاہ سلمان اور ولی عہد شہزادہ محمد بن سلمان سے بھی ملاقات کریں گے جس میں باہمی دلچسپی کے امور پر تبادلہ خیال کیا جائے گا۔