مقبوضہ کشمیر میں مشترکہ مزاحمتی قیادت نے کہا ہے کہ بھارت کو اس حقیقت کا ادراک کرلینا چاہیے کہ بھارت میں کشمیریوں پر تشدد ، ان کے املاک کی تو ڑ پھوڑ، لوٹ مار اور ان کی بے حرمتی کرنے کی ویڈیوز، خبروں اور تصاویر سے انسانیت میں صرف نفرت ہی پھیلے گی۔ مشترکہ مزاحمتی قیادت نے ایک بیان میں کہا ہے کہ کشمیریوں پر منظم حملے بھارت میں حکمران جماعت کی طرف سے بظاہر اکسانے کے نتیجے میں کئے گئے ہیں کیونکہ آج تک کسی ایک کو بھی گرفتار کیاگیا اور نہ ہی کسی کو کوئی جرمانہ کیاگیا۔