وزیر اعظم عمران خان نے کہا ہے کہ ساہیوال واقعہ سے متعلق مشترکہ تحقیقاتی ٹیم کی رپورٹ کے بعد ذمہ داروں کے خلاف فوری کارروائی کی جائے گی۔
انہوں نے آج ایک ٹویٹر پیغام میں کہا کہ محکمہ انسداد دہشت گردی نے دہشت گردی کے خلاف جنگ میں اہم کردار ادا کیا ہے تاہم قانون کے سامنے ہر فرد جواب دہ ہے۔
انہوں نے کہا کہ تمام شہریوں کا تحفظ حکومت کی ترجیح ہے۔
عمران خان نے کہا کہ وہ ان خوف زدہ بچوں کو دیکھ کر ابھی تک صدمے میں ہیں جن کی آنکھوں کے سامنے اُن کے والدین پر فائرنگ کی گئی۔
انہوں نے کہا کہ ریاست اب ان بچوں کی مکمل دیکھ بھال کرے گی جو اس کی ذمہ داری ہے۔