Saturday, 23 February 2019, 06:11:08 am
معاون خصوصی کاغیر ملکی جیلوں میں قید پاکستانیوں کی حالت زار کا نوٹس
January 20, 2019

بیرون ملک مقیم پاکستانیوں اور انسانی وسائل کی ترقی کے بارے میں وزیراعظم کے خصوصی معاون سید ذوالفقار عباس بخاری نے بیرون ملک غیر ملکی جیلوں میں قید پاکستانیوں کی حالت زار کا سخت نوٹس لیتے ہوئے حکومت کی جانب سے ان کی ترجیحی بنیادوں پر رہائی کے پختہ عزم کا اعادہ کیا ہے۔

اے پی پی سے گفتگو کرتے ہوئے انہوں نے کہا کہ حکومت ان کی جلد رہائی کیلئے تمام دستیاب وسائل اور ذرائع استعمال کرے گی۔انہوں نے کہا کہ حکومت جیلوں میں قید ان پاکستانیوں کو واپس لانے کیلئے طریقہ کار وضع کرنے کی غرض سے دوبئی، قطر اور سعودی عرب میں حکام سے پہلے ہی رابطے میں ہے جو معمولی جرائم کے ارتکاب اور مختلف مسائل کی وجہ سے اپنے گھروں کو واپس نہیں جاسکے۔سید ذوالفقار عباس بخاری نے بحرین کی جانب سے بارہ پاکستانی قیدیوں کی رہائی کے حالیہ فیصلے کا خیر مقدم کیا۔بیرون ملک مقیم پاکستانیوں اور انسانی وسائل کی ترقی کے بارے میں سینیٹ کے ادارے نے حال ہی میں وزارت سے مختلف ملکوں کی جیلوں میں قید پاکستانیوں کیلئے انتظامات کی مکمل تفصیل طلب کی ہے۔اس سے پہلے لاہور ہائی کورٹ میں وزارت داخلہ کی جانب سے پیش کی گئی رپورٹ سے پتہ چلا ہے کہ غیر ملکی جیلوں میں گیارہ ہزار آٹھ سو سے زائد پاکستانی قید ہیں۔