قومی اسمبلی کے سپیکر اسد قیصر نے یقین دلایا ہے کہ میڈیا ٹربیونل کے قیام سے متعلق قانون میڈیا کے ساتھ مشاورت کے بعد تشکیل دیا جائے گا۔
وہ جمعرات کے روز پارلیمنٹ ہاوس اسلام آباد میں پارلیمانی رپورٹر ایسوسی ایشن کی حلف برادری کے سلسلے میں تقریب سے خطاب کررہے تھے۔
سپیکر نے کہا کہ صحافیوں کےخلاف کوئی قانون نہیں بنایا جائے گا بلکہ ان کے حقوق کا مکمل تحفظ کیا جائے گا۔ انہوں نے کہا کہ صحافیوں کو ذرائع ابلاغ کے ٹربیونلز کے قانون پر بحث سے متعلق قائمہ کمیٹی کی کارروائی کاحصہ بنایا جائے گا۔
اس موقع پر گفتگو کرتےہوئے اطلاعات اور نشریات کے بارے میں معاون خصوصی ڈاکٹر فردوس عاشق اعوان نے کہا کہ ذرائع ابلاغ کو ریاست کے چوتھے ستون کی حیثیت سے ذمہ داری کا مظاہرہ کرنا چاہیے۔