وزیر خارجہ شاہ محمود قریشی نے کہا ہے کہ پاکستان تحریک انصاف کی حکومت بنیادی ڈھانچے کی ترقی کیلئے جامع اصلاحات متعارف کرارہی ہے۔

برطانیہ کے بین الاقوامی ترقی کے وزیر Rory سٹیورٹ سے لندن میں گفتگو کرتے ہوئے انہوں نے کہا کہ موجودہ حکومت سماجی و اقتصادی ترقی کے ایجنڈے پر عمل پیرا ہے۔ وزیر خارجہ نے کہا کہ پاکستان برطانیہ کے ساتھ اپنے تعلقات کو بہت اہمیت دیتا ہے اور برطانیہ کے ساتھ دوطرفہ اقتصادی اور تجارتی تعلقات مزید مضبوط بنانے کا خواہاں ہے۔

شاہ محمود قریشی نے کہا کہ برطانیہ کے بین الاقوامی ترقی کے ادارے نے پاکستان میں تعلیم اور صحت کے شعبے میں نمایاں خدمات انجام دی ہیں اور ہم اس تعاون کو مزید فروغ دینے کے خواہاں ہیں۔برطانیہ کے بین الاقوامی ترقی کے وزیر نے باہمی دلچسپی کے معاملات میں اپنے ملک کے تعاون کا یقین دلایا۔