وزیرخارجہ شاہ محمودقریشی نے کہاہے کہ حکومت اقتصادی سفارتکاری پرتوجہ مرکوزکررہی ہے اور بیرون ملک تعینات پاکستانی سفارتکاروں کو ہدایت کی کہ وہ ملک میں سرمایہ کاری لانے میں موثرکرداراداکریں۔ملتان میں تاجروں کی جانب سے اپنے اعزازمیں ایک تقریب میں اظہارخیال کرتے ہوئے انہوں نے کہاکہ تحریک انصاف کی حکومت کی جانب سے کئے گئے موثراقدامات کے مثبت نتائج برآمدہوناشروع ہوگئے ہیں اوراقتصادی صورتحال میں روزبروزبہتری آرہی ہے۔شاہ محمودقریشی نے کہاکہ جب تحریک انصاف کی حکومت نے اقتدارسنبھالاتوملک کو بجٹ اور تجارتی خسارے کاسامناتھا اورسٹاک مارکیٹ کی صورتحال بھی غیرتسلی بخش تھی۔انہوں نے کہاکہ حکومت نے معیشت کودرست سمت میں گامزن کرنے کے لئے مشکل فیصلے کئے جن کے نتیجے میں تاجربرادری کوبھی بعض مشکلات کاسامناکرناپڑا۔تاہم انہوں نے یقین دلایا کہ حکومت تاجروں کوزیادہ سے زیادہ سہولتیں فراہم کریگی کیونکہ قومی معیشت کے استحکام کے لئے اُن کاکردارناگزیرہے۔(این این آر، وہاج بشیر)