کل جماعتی حریت کانفرنس نے آج اسلام آباد میں ایک احتجاجی مظاہرے کا انعقاد کیا جس میں مقبوضہ کشمیر میں بھارتی فوج کے ہاتھوں کشمیری نوجوانوں کے بے رحمانہ قتل اورحریت رہنماوں کو غیر قانونی طورپر زیر حراست رکھنے کی سخت مذمت کی گئی۔مظاہرین نے بینرز اور پلے کارڈ اٹھا رکھے تھے جس پر بھارت مخالف نعرے درج تھے، مظاہرین نے مقبوضہ کشمیر پر بھارت کے غاصبانہ قبضے کے خلاف شدید نعرے بازی کی۔
اس موقع پر کل جماعتی حریت کانفرنس کے رہنماوں نے اس بات پر زوردیا کہ خطے میں پائیدار قیام امن کے لئے کشمیر کے مسئلے کا حل ناگزیر ہے۔انہوں نے کہاکہ حریت رہنماوں کو کسی جرم کے بغیر کالے قانون کے تحت زیر حراست رکھاگیا ہے۔
انہوں نے عالمی برادری پر زور دیا کہ وہ کشمیر کے مسئلےکے جلد حل کے لئے مداخلت کرے۔