جماعت اسلامی کے سربراہ سراج الحق نے کہا ہے کہ امت مسلمہ القدس کو اسرائیل کا دارالحکومت بنانے کی اجازت نہیں دے گی۔ اتوار کے روز کراچی میں فلسطینی عوام کے ساتھ اظہار یکجہتی کے لئے اپنی جماعت کے زیراہتمام ملین مارچ سے خطاب کرتے ہوئے انہوں نے مطالبہ کیا کہ بیت المقدس کو اسرائیل کا دارالحکومت تسلیم کرنے کا امریکی فیصلہ واپس لینے تک اسلامی ممالک کو امریکہ کے ساتھ اپنے سفارتی تعلقات منقطع کر کے امریکی سفیروں کو اپنے ملکوں سے نکال دینا چاہئے۔اس سے پہلے بڑی تعداد میں لوگوں نے شہر میں یونیورسٹی روڈ پر نیپاچورنگی سے مارچ کیا جو حسن اسکوائر پر ختم ہوا۔ دیگر مذہبی اور سیاسی جماعتوں کے رہنماؤں نے بھی مارچ میں شرکت کی۔