پاکستان نے دو ٹوک الفاظ میں کہا ہے کہ بھارت کی جانب سے مغربی دریائوں کا رخ موڑنے کی کسی بھی کوشش کو جارحیت سمجھا جائے گا اور پاکستان جواب دینے کا حق رکھتا ہے۔
آج اسلام آباد میں ہفتہ وار نیوز بریفنگ کے دوران دفتر خارجہ کے ترجمان ڈاکٹر محمد فیصل نے بھارتی وزیراعظم نریندرمودی کے حالیہ بیان پر شدید ردعمل کا اظہار کیا جس میں پاکستان کی طرف بہنے والے دریاوں کے پانی کو روکنے کی دھمکی دی گئی ہے۔
ترجمان نے کہا کہ سندھ طاس معاہدے کے تحت تین مغربی دریاوں کے پانی پر پاکستان کا خصوصی حق ہے۔
محمد فیصل نےکہا کہ بھارتی قیادت کی جانب سے ایسے بیانات اس حقیقت کی ایک اور بدترین مثال ہےکہ مودی حکومت بھارت کو ایک غیر ذمہ دار اور جارح ریاست بنانے پر تلی ہے جہاں نہ تو انسانی حقوق کا احترام ہے اور نہ ہی بین الاقوامی ذمہ داریوں کی پاسداری کی جاتی ہے۔
مقبوضہ کشمیر میں بھارت کی جانب سے انسانی حقوق کی سنگین خلاف ورزیوں کی مذمت کرتے ہوئے ترجمان نے کہا کہ مسلسل فوجی محاصرے اور مواصلات کی مکمل بندش کے باعث مقبوضہ وادی میں انسانی بحران کی صورتحال مزید بگڑ رہی ہے ،انہوں نے کہا کہ اس صورتحال سے لوگوں کی زندگیوں کو خطرات لاحق ہیں۔
(این این آر/نصیرقریشی )