پاکستان نے فلسطینیوں کی حالت زارکامسئلہ حل کرنے کیلئے اسلامی تعاون تنظیم کے کسی بھی اقدام کی حمایت کرنے اور امریکی سفارتخانہ مقبوضہ بیت المقدس منتقل کئے جانے کیخلاف اقوام متحدہ کی سلامتی کونسل کی جانب سے غزہ میں فلسطینی مظاہرین پر اسرائیلی فوج کی جارحیت کی مذمت نہ کئے جانے پرافسوس کااظہارکیاہے۔
اقوام متحدہ میں پاکستان کی مستقل مندوب ملیحہ لودھی نے اسلامی تعاون تنظیم کے سفارتکاروں کے ہنگامی اجلاس میں اظہارخیال کرتے ہوئے اس بات پرافسوس ظاہر کیا کہ ایک ملک نے کونسل کے چودہ ارکان کی جانب سے ان واقعات کی آزادانہ تحقیقات کی اپیل کو مسترد کردیاہے۔
انہوں نے بعض ممالک کی طرف سے دونو ں طرف صبروتحمل کا مظاہرہ کرنے کی اپیل کو انتہائی دوہرا معیار قرار دیا جس کا مقصد قابض طاقت اور فلسطینیوں کوہم پلہ ظاہر کرنا ہے۔
انہوں نے کہا کہ امریکہ کا اپنے سفارتخانے کو تل ابیب سے مقبوضہ بیت المقدس منتقل کرنے کاا قدام بین الاقوامی قوانین اور طاقت کے بل بوتے پر کسی علاقے پر قبضہ کرنے سے ممانعت سے متعلق اقوام متحدہ کے منشور کے منافی ہے۔
اس اقدام سے مشرق وسطی میں دو ریاستی حل کے کسی بھی امکان کو شدید نقصان پہنچے گا۔
