سپریم کورٹ نے سرکاری اشتہارات سے سیاسی رہنمائوں کی تصاویراگلے ماہ کی تین تاریخ تک ہٹانے کا حکم دیا ہے۔
چیف جسٹس میاں ثاقب نثار کی سربراہی میں عدالت عظمیٰ کے تین رکنی بنچ نے ازخودنوٹس کی سماعت کرتے ہوئے سیاسی رہنمائوں کی تصاویر کے ساتھ سرکاری اشتہارات کی تفصیلات طلب کرلی۔چیف جسٹس نے ایسے اقدامات پر سرکاری فنڈز واپس کرنے کاحکم دیتے ہوئے ریمارکس دئیے کہ مستقبل میں سرکاری اشتہارپرکسی سیاسی رہنما کی تصویر نہ لگائی جائے۔
سپریم کورٹ کراچی رجسٹری میں پی آئی اے میں مسافروں کے سامان کی گمشدگی سے متعلق ایک اور مقدمے کی سماعت کرتے ہوئے چیف جسٹس نے انسداد منشیات فورس اور ایف آئی اے سے اس ضمن میں رپورٹ طلب کرلی ۔عدالت نے متعلقہ اداروں کو ہوائی اڈوں پرمسافروں کے سامان کی گمشدگی کے مسئلے کے حل کیلئے دس دن کے اندر اپنی سفارشات پیش کرنے کا بھی حکم دیا۔