فائل فوٹو

 مقبوضہ کشمیر میں بھارتی فوج کے ہاتھوں گیارہ نوجوانوں کی شہادت کے واقعات پر آج دوسرے روز بھی مکمل ہڑتال ہے۔

 گزشتہ روز ضلع پلوامہ میں گھر گھر تلاشی، محاصرے اور مظاہرین پر بھارتی فوجیوں کی فائرنگ سے یہ نوجوان شہید کردئیے گئے تھے۔

 ادھر حریت رہنماوں اور تنظیموں نے بھارتی فوج کی طرف سے خونریزی کےجاری واقعات کو بھارتی حکومت اور اس کے گماشتوں کی طرف سے کشمیریوں کی نسل کشی قرار دیتے ہوئے ان کی شدید مذمت کی ہے۔

کشمیر کونسل یورپ کے چیئرمین علی رضا سید نے برسلز میں ایک بیان میں پلوامہ کے واقعات کو کشمیریوں کے قتل عام کا نیا سلسلہ قرار دیتے ہوئے اس کی شدید مذمت کی اور اسے بدترین درندگی قرار دیا۔

 مشترکہ حریت قیادت کی اپیل پر کل بادامی باغ سرینگر میں کشمیریوں کی شہادت کے واقعات پر احتجاج ریکارڈ کرانے کے لئے بھارتی فوج کے ہیڈ کوارٹرز کی طرف مارچ کیا جائے گا۔