سپریم کورٹ نے بلوچستان کے ضلع خاران میں چھ مزدوروں کی ہلاکت سے متعلق ازخود نوٹس کی سماعت کل تک ملتوی کردی ہے۔

 جسٹس عمر عطا بندیال اور جسٹس اعجاز الاحسن پر مشتمل عدالت عظمی کے دو رکنی بنچ نے آج اسلام آباد میں ازخود نوٹس کی سماعت کی۔

 پنجاب سےتعلق رکھنے والے تمام چھ مزدور اس ماہ کی چار تاریخ کو اس وقت نامعلوم شرپسندوں کی  فائرنگ سے جاں بحق ہوگئے تھے جب وہ خاران میں ایک سیلولر کمپنی کے ٹاور پر کام کررہے تھے۔

 کمپنی کے وکیل نے عدالت کو بتایا کہ مقتول مزدوروں کے خاندانوں کو معاوضہ ادا کیا جارہا ہے۔

عدالت نے کمپنی کے وکیل کو حکم دیا کہ مقتول مزدوروں کے ورثا اور زخمیوں کےلئے جامع امدادی پیکیج تیار کرکے اگلی سماعت پر پیش کیا جائے۔