نیپال کی فوج کے سربراہ جنرل راجندرا چھیتری نے آج جنرل ہیڈکوارٹرز راولپنڈی میں بری فوج کے سربراہ جنرل قمر جاوید باجوہ سے ملاقات کی۔ملاقات کے دوران دونوں ملکوں کی افواج کے درمیان تعلقات ، علاقائی سلامتی کی صورتحال اور باہمی تعلقات بہتر بنانے سے متعلق اقدامات سمیت باہمی دلچسپی کے امور پر تبادلہ خیال کیا گیا۔فوج کے شعبہ تعلقات عامہ کے مطابق دورے پر آئے مہمان نے دہشتگردی کے خلاف جنگ اور خطے میں استحکام کیلئے پاک فوج کی قربانیوں اور کوششوں کا اعتراف کیا اور ان کی تعریف کی۔اس سے پہلے جی ایچ کیو آمد پر نیپالی آرمی چیف نے یادگار شہداء پر پھولوں کی چادر چڑھائی۔پاک فوج کے چاق وچوبند دستے نے نیپالی فوج کے سربراہ کو گارڈ آف آنر پیش کیا۔