بنگلہ دیش نے سات لاکھ روہنگیا مسلمان پناہ گزینوں میں سے پہلے پانچ افراد کی وطن واپسی سے متعلق میانمار کے دعویٰ کو مسترد کردیا ہے یہ روہنگیا مسلمان ملک میں اقلیتوں کے خلاف فوجی تشدد کے باعث پڑوسی ملک نقل مکانی کر گئے تھے۔
بنگلہ دیش کے وزیر داخلہ اسد الزمان نے آج ایک بیان میں کہاکہ ایک روہنگیا مسلمان خاندان کو واپس بھجوائے جانے کے میانمار کے دعویٰ کو جھوٹا قرار دیا اورکہا کہ یہ خاندان کبھی بنگلہ دیش آیا ہی نہیں تھا۔
اس سے قبل میانمار حکومت نے ایک بیان میں کہا تھا کہ ایک ہی خاندان کے پانچ ارکان سرحدی علاقے سے مغربی ریاست راکھائن واپس پہنچے ہیں۔