سپریم کورٹ کے چیف جسٹس آصف سعید کھوسہ نے پنجاب انسٹیٹیوٹ آف کاریالوجی لاہور پر حملے کی مذمت کی ہے اور امید ظاہر کی ہے واقعے کے بعد پیدا ہونے والی صورتحال سے عہدہ براہ ہونے کیلئے تدبر اختیار کیا جائیگا۔
فوری انصاف کی فراہمی کے بارے میں وفاقی جوڈیشل اکیڈمی اسلام آباد میں ایک قومی کانفرنس سے خطاب کرتے ہوئے چیف جسٹس نے کہا کہ وہ اس بات پر یقین رکھتے ہیں کہ قانون اور طب دو مقدس پیشے ہیں اور انہوں نے ان شعبوں میں کام کرنے والوں پر زور دیا کہ وہ ان شعبوں کا تقدس برقرار رکھنے کے اقدام کریں۔چیف جسٹس نے تاخیر پر مبنی انصاف کے نظام میں گزشتہ گیارہ ماہ میں لائی گئی اصلاحات پر بھی گفتگو کی۔ماڈل عدالتوں کی کارکردگی پر اظہا خیال کرتے ہوئے انہوں نے کہا کہ ماڈل عدالتوں کی مدد سے عوام کو فوری انصاف فراہم کیا جارہا ہے اور سائلین اب اپنے مقدمات کو ماڈل عدالتوں میں منتقل کرنے کی درخواست کررہے ہیں۔(این این آر، وہاج بشیر)