صدر ڈاکٹر عارف علوی نے کہا ہے کہ وفاقی حکومت بلوچستان کے احساس محرومی کے خاتمے کو انتہائی اہمیت دیتی ہے۔ آج کوئٹہ میں گورنر ہاوس میں خصوصی افراد کی بحالی سے متعلق اجلاس کی صدارت کرتے ہوئے انہوں نے کہا کہ خصوصی افراد کو معاشرے کا مفید شہری بنانا ضروری ہے۔ ڈاکٹر عارف علوی نے کہا کہ ہمیں خصوصی افراد کی تربیت کی ضرورت ہے تاکہ وہ ملکی ترقی میں حصہ لے سکیں۔ انہوں نے کہا کہ ہم بلوچستان کی ترقی کیلئے اضافی فنڈز فراہم کرنے کیلئے پرعزم ہیں۔ خاتون او ل بیگم ثمینہ عارف علوی ،وزیراعلی بلوچستان میر عبدالقدوس بزنجو ،گورنر بلوچستان سید ظہور آغا اور عالمی ادارہ صحت کی نمائندہ مریم ملک بھی ملاقات میں موجود تھیں۔