منصوبہ بندی وترقی اورخصوصی اقدامات کے وزیراسدعمرنے کہاہے کہ جنوبی اضلاع کے ترقیاتی پروگرام کو حتمی شکل دینے کے لئے وفاقی اورصوبائی حکومتیں مل کرکام کریں گی۔اسدعمرنے بلوچستان کے اپنے دوروزہ دورے میں صوبائی وزراء سے گفتگوکرتے ہوئے کہاکہ وفاقی اورصوبائی حکومتیں اس پروگرام کی جزئیات کو حتمی شکل دیں گی اوراس پرتیزی کے ساتھ عملدرآمدکریں گی۔انہوں نے معاشرے کے مختلف طبقات سے تعلق رکھنے والے افراد سے ملاقات بھی کی جنہوں نے علاقے کے مسائل ا ور ضروریات کے بارے میں انہیں آگاہ کیا۔انہوں نے بعدازاں ذرائع ابلاغ سے گفتگو کرتے ہوئے کہاکہ وزیراعظم عمران خان بلوچستان کی تعمیروترقی میں خصوصی دلچسپی لے رہے ہیں تاکہ صوبے سے پسماندگی کاخاتمہ ہو اور اسے ترقی یافتہ علاقوں کے برابرلایاجاسکے۔انہوں نے کہاکہ چین پاکستان اقتصادی راہداری منصوبہ ایک بڑی تبدیلی لائے گا اور اس سے خطے اورملک خاص طورسے مکران ڈویژن سمیت بلوچستان میں خوشحالی آئے گی۔انہوں نے کہاکہ سی پیک کے منصوبوں کے تحت گوادر کے علاوہ بوستان اور حب میں بھی صنعتی زون قائم کئے جارہے ہیں۔