غیرقانونی طورپر بھارت کے زیر قبضہ جموںوکشمیر میں کل جماعتی حریت کانفرنس اور دیگر حریت رہنماؤں نے بھارت اور مقبوضہ علاقے کی مختلف جیلوں میں نظربند کشمیریوں کے ساتھ روارکھے جانے والے غیر انسانی سلوک کی شدید مذمت کی ہے۔
کشمیر میڈیا سروس کے مطابق کل جماعتی حریت کانفرنس کے جنرل سیکرٹری مولوی بشیر احمد عرفانی نے سرینگر میں جاری ایک بیان میں کہا کہ کشمیری نظربندوں کے ساتھ غلاموں جیسا سلوک کیا جارہا ہے اور جیلوں کو تشدد کے مراکز میں تبدیل کر دیا گیا ہے۔
انہوں نے افسوس کا اظہار کیاکہ کشمیری نظربندوں کو مناسب غذا اور علاج ومعالجے سمیت بنیادی سہولیات سے محروم رکھا گیا ہے۔انہوں نے اقوام متحدہ کی انسانی حقوق کونسل اور انسانی حقوق کے دیگر اداروں پر زوردیا کہ وہ نظربندوں کی حالت زار کا مشاہدہ کرنے کے لئے بھارتی جیلوں کا دورہ کریں۔