صدرڈاکٹر عارف علوی نے خصوصی افراد کی ضروریات پوری کرنے اور زندگی کے مختلف شعبوں میں فعال شرکت کے لئے ان کی حوصلہ افزائی کے لئے موثر اقدامات کرنے کی ضرورت پر زور دیا ہے۔

انہوں نے پیر کے روز اسلام آباد میں ایک اجلاس کی صدارت کرتے ہوئے خصوصی افراد کی سہولت کے لئے ان کے اندراج کا عمل آسان بنانے کی ضرورت پر زور دیا۔صدر نے کہا کہ موثرانداز میں ان کی ضروریات پوری کرنے کیلئے سروے انتہائی ضروری ہے۔انہوں نے متعلقہ فریقوں سے کہا کہ وہ خصوصی افراد کی اقتصادی بہتری اور انہیں قومی تعلیمی نظام کا حصہ بنانے کے لئے اقدامات کریں۔غربت کے خاتمے کی معاون خصوصی ڈاکٹر ثانیہ نشتر نے اجلاس کو بتایا کہ احساس پروگرام کے تحت سروے اور رجسٹریشن آئندہ سال جون تک مکمل ہو گی۔