فیڈرل فلڈ کمیشن کے چیئرمین احمد کمال نے کہا ہے کہ عالمی حدت کے باعث سطح سمندر بلند ہونے کی وجہ سے کراچی اور بلوچستان کے ساحلی علاقوں میں سمندری طوفان کی کیفیت میں بتدریج اضافہ ہوا جوشدید بارشوں کا سبب بنا۔انہوں نے آج سہ پہر ریڈیوپاکستان کے خبروں اور حالات حاضرہ کے چینل پر ایک خصوصی انٹرویو میں کہا کہ نکاسی آب کا پرانا نظام کراچی میں بارشوں سے حالیہ تباہ کاری کی بڑی وجہ ہے۔انہوں نے کہا کہ بغیر منصوبہ بندی بڑھتی ہوئی شہری آبادی سے حدت پیدا ہونے کے باعث کراچی میں سیلاب بڑھ رہے ہیں۔احمد کمال نے کہا کہ کراچی میں 2010ء ،2011ء اور 2014ء کے سمندری طوفانوں کے اثرات پڑے۔چیئرمین نے کہا کہ کمیشن قدرتی آفات سے نمٹنے کا قومی ادارہ اور واپڈا سمیت تمام قومی اداروں کے ساتھ قریبی رابطے میں ہے جس کا مقصد وفاقی دارالحکومت میں بارشوں کی وجہ سے متوقع سیلابی ریلے سے پیدا ہونے والی ہنگامی صورتحال سے نمٹنا ہے۔