چیف جسٹس میاں ثاقب نثار کی سربراہی میں سپریم کورٹ کے تین رکنی بنچ نے کہا ہےکہ سیمنٹ فیکٹریوں کو اس زیر زمین پانی کی ادائیگی کرنا ہوگی جو وہ استعمال کررہی ہیں۔
آج اسلام آباد میں سیمنٹ فیکٹریوں سےمتعلق مقدمے کی سماعت کرتے ہوئے چیف جسٹس نے ریمارکس دئیے کہ زیر زمین پانی انتہائی قیمتی ہے اور سیمنٹ فیکٹریاں یہ پانی استعمال کررہی ہیں تاہم یہ پانی اب ان کے لئے مفت دستیاب نہیں ہوگا۔
منرل واٹر کمپنیوں کی طرف سے زیر زمین پانی کے استعمال کا نوٹس لیتے ہوئے چیف جسٹس نے پنجاب فوڈ اتھارٹی کو ہدایت کی کہ وہ ان تمام کمپنیوں سےرپورٹ طلب کرے کہ وہ کتنا پانی استعمال کررہی ہیں اور وہ اس کے لئے کیا ادائیگیاں کررہی ہیں۔