وزیر خارجہ شاہ محمود قریشی نے عالمی مالیاتی اداروں پر زور دیا ہے کہ وہ ترقی پذیر ملکوں کو مالی سہولت فراہم کریں تاکہ وہ اپنے صحت کے کمزور نظام میں سرمایہ کاری کر سکیں۔ ریڈیو پاکستان کے خبروں اور حالات حاضرہ کے چینل سے گفتگو کرتے ہوئے انہوں نے کہا کہ کورونا وائرس کی وباء پھوٹنے کے بعد ملک میں اس وقت اقتصادی صورتحال گھمبیر ہو گئی ہے۔انہوں نے کہا کہ اس وباء کے عالمی معیشت پر تباہ کن اثرات مرتب ہوئے ہیں اور یہ کساد بازاری کا باعث بن گئی ہے۔وزیرخارجہ نے کہاکہ کورونا وائرس کی وباء سے پہلے تمام اقتصادی اشاریے درست سمت میں گامزن تھے تاہم اب برآمدات اورترسیلات زر میں کمی آگئی ہے۔انہوں نے کہاکہ مشکل صورتحال کے باوجود حکومت کی اقتصادی ٹیم نے کامیابی کے ساتھ نہایت متوازن بجٹ پیش کیاہے۔انہوں نے کہاکہ حکومت اقتصادی شرح نمو کی بحالی کے لئے تمام ممکنہ کوششیں کررہی ہے اورتعمیرات اورزراعت جیسے شعبوں پرخصوصی توجہ دی جارہی ہے۔