اطلاعات ونشریات کے بارے میں وزیراعظم کی معاون خصوصی فردوس عاشق اعوان نے کہا ہے کہ ترک صدر رجب طیب اردوان کا پارلیمنٹ کے مشترکہ اجلاس سے چوتھا خطاب پاک ترک لازوال دوستی کا مظہر ہے ۔انہوں نے آج متعدد ٹویٹس میں کہاکہ اقوام متحدہ کی جنرل اسمبلی میں مسئلہ کشمیر پرپاکستان کے موقف کی حمایت کرنے کے باعث پاکستان کے عوام کے دلوں میں ترکی کی قیادت اور ان کے عوام کیلئے خصوصی احترام ہے ۔فردوس عاشق اعوان نے کہاکہ پاکستان اور ترکی کے تعلقات ، مشترکہ عقیدے اور ثقافت کی مضبوط بنیادوں پراستوار ہیں۔انہوں نے اس اعتماد کااظہار کیاکہ ترک صدر کا یہ دورہ دونوں ملکوں کے درمیان اقتصادی ، تجارتی اور ثقافتی تعلقات کو نئی بلندیوں پرلے جانے کا باعث بنے گا ۔