بھارتی حکومت نے اس بات کا اعتراف کیا ہے کہ آرٹیکل تین سو ستر ختم کرنے کے بعد گزشتہ دو ماہ میں مقبوضہ کشمیر میں احتجاجی مظاہروں کے 330 سے زائد واقعات پیش آئے۔
بھارتی حکومت کی داخلی سلامتی کی رپورٹ میں کہاگیا ہے کہ ان میں زیادہ تر مظاہروں میں پتھرائو کے واقعات رونما ہوئے ۔رپورٹ میں کہاگیا ہے کہ ان مظاہروں میں سڑسٹھ فیصد مظاہرے سری نگر، بڈگام اور پلوامہ میں کئے گئے۔ادھر بھارتی حکومت کی جانب سے مقبوضہ کشمیر میں آج فوجی محاصرہ انہتر ویں روز میں داخل ہوگیا جس کے باعث شہریوں کو شدید مشکلات کا سامنا ہے ۔بھارتی فوج نے آج مسلسل سولہویں روز بھی ضلع گاندربل میں محاصرے اور تلاشی کی کارروائی جاری رکھی۔